Ayol o'zi nima? - 24 Ноября 2013

Онлайн всего: 1

Гостей: 1

Пользователей: 0

"Balki savol noto'g'ri qo'yilgandur..."ayol o'zi kim?", deyish to'g'riroq emasmikin?", deb hayron bo'lishingiz joiz, lekin maqolani o'qib nega bunday deganimizni tushunasiz degan umiddamiz.

"Ayol - dunyoni tebratadi", "Ayol - ulug' zot",... deydilar, davom ettirsak ayolga aytilgan buyuk soz'lar juda ko'p. Hayotda afsus, ko'pchilik ayollar bu so'zlarning asl ma'nosini his etmay yashaydilar. Erkak uchun ayol nima?

"Avallambor farzandlarining onasi", deymiz Ha, ayol farzand dunyoga keltiradi, uni voyaga yetkazishda ham asosiy o'rinni egallaydi. Erkak bu ayolni hurmat qiladi-yu, lekin o'sha ulug' zotchalik darajaga ona bo'lgani uchungina ko'tara olmaydi.

Yoki "erkak uchun ayol turmush o'rtoq", deymiz. Erkakning yonida butun umr unga soya bo'lib turadigan, issiq-sovig'udan xabardor bo'ladigan, o'zi haqida o'ylamay eri uchun yashaydigan vafoli do'stdir. Lekin shu vafoga yarasha ba'zi ayollar o'z eridan xiyonat ko'radilar.

Yana bir misol, "Erkak uchun ayol uyining bekasi". "Uy bekasi", degan ibora aslida "Uy ho'jayini", degan ma'noni anglatishini unutib qo'yganmiz. Chunki ayol yillar davomida uy bekalik qilaverib, xonimdan oddiy farrosh, oshpaz va kiryuvuchi darajasiga tushib ketadi. Shuning uchun, uy bekasi deganda ko'z oldimizga go'zal kiyimlar kiyib o'tirgan xonim-ayolni emas, balki uylarni supurib-sidirayotgan ayolni keltiramiz holos.

Ayolga talab ko'p qo'yilgan. Hatto insonni dunyoga keltirish vazifasi ham ayoldadir. Erkak yiqilganda uni ko'tara oladigan ham ayol, ruhan singan erkakka kuch bag'shida etadigan ham ayol.

Nega unda erkaklar bu haqda unutib qo'yadilar? Nega erkak ayolga qaraganda yuqoriga emas, balki pastga tomon qaraydi?

Ayolni sevadi-yu lekin unga xiyonat qiladi. Ayolni hurmat qila turib, uni o'z ota-onasidan himoya qila olmaydi. Ayolini qadrlaydi-yu, lekin uy ishlarida uni avaylamaydi...nega?

Chunki ayol o'z qadrini yo'qotib qo'ygan. Bunga sabab esa bolaligimizdir.

Bir xonadonda o'g'il tug'iladi, bir xonadonda qiz. Ikkala farzand ham sog'lom, to'rt muchchasi but. Lekin negadur, negadur o'gil tug'ilgan xonadondan ko'proq xursandchilik eshitiladi. Qiz tug'ilgan xonadonda esa, xursandchilik bor-u lekin nimadur yetishmayotgandek. Ayol bu dunyoga kelishidanoq o'zini o'g'ildan ko'ra zaifroq his qiladi va butun umr singan qadrini ko'tarish niyatida erkaklarga xizmat qiladi. Negadur o'zbek oilalarida shunday dunyoqarash hozirgi 21 asrda ham davom etib kelmoqda. O'g'il tug'ilishi kerak, o'g'il bo'lsa yaxshi, o'g'il bo'lsa g'ururlanish kerak va hokazo. Bu gaplar va dunyoqarash bilan o'sayotgan qiz albatta ayollik qadrini yo'qotishi ajab emas. Albatta hamma oilada ham bunday emas. Yaxshiyamki, qiz tug'ilsa ham cheksiz xursand bo'ladiganlar ham oramizda juda ko'p.

Axir oilada ayol tug'ilishi - bu Ollohning ne'mati emasmi?

Ayol bilan oilaga baraka keladi. Ayol bor uyda yaxshiliklar ko'p bo'ladi. Ayol uchun dunyodagi barcha ezguliklar va go'zalliklar yaratilgandir. Ayol uchun erkak o'ladi, ayol uchun erkak yashaydi. Bu haqiqat, lekin ko'rinmas va tan olinmaydigan haqiqatdir. Hatto ashaddiy futbolchilar ham eng zo'r "go'l"ini o'z ayoliga bag'ishlaydi, do'stiga emas.

Shunday ekan, "ayol nima?", degan savolga faqat bir javob mos kelishi mumkin. Ayol - bu sovg'adir. Har bir erkak qalbiga quvonch, malham, xursandchilik va baxt keltira oladigan katta sovg'adir. Bolalikdan hamma sovg'a olishni yaxshi ko'radi. Sovg'a olsak, quvonamiz, ko'z yoshlarimiz chekinadi, dilimiz yorishadi. Ayol ham shunday. Ayol borki, erkak kuchli bo'la oladi. Faqat bu haqda ayolning o'zi unutmasligi kerak. Kechayu-kunduz uy bekasi, farzandlarning onasi bo'lib yurganida, hatto erkak tomonidan qadrsizlanayotganda aslida u eri uchun berilgan ajoyib sovg'a ekanligini va shunga yarasha munosabatga loyiq ekanligini unutmasligi lozim.

Sovg'aning go'zalligi, tashqi ko'rinishi, ichki dunyosi, hatto eskrishi uning egasi - erkakning qo'lidadir. Sovg'ani avaylash kerak, shunda butun umr udan bahramand bo'lsa bo'ladi.